المفتول جاهزاً
زمانكم-
وفق نتائج البحوث التي أجرتها الأكاديمية الأردنية انعام الور أستاذة اللغويات، فإن لهجة عمان هي مزيج من لهجتي السلط ونابلس. ولدى الدكتورة انعام ما تقوله حول الأمر.
هنا نرفق نصاً باللهجة المحكية أملته علينا سيدة ثمانينية سلطية الأصل تسكن في عمان منذ خمسينات القرن العشرين.
النص عبارة عن وصف لطبخة “المفتول”. وقد حاولنا ضبط اللهجة ما أمكن:
نترككم مع نص جميل: مع ملاحظة أن الصور لا تنطبق تماماً مع الوصف.
المفتول:
بِفْرِيْكِهْ بْنِعْمَلُهْ. فِيْ ناسْ بِعِمْلوهْ عَبُرْغل. كُنْت افِتْلُهْ أنا. كُنْت أعْمَلْ لِفْريكِهْ، ثَلَثْ أنواع: نوعْ لَشّورَبَهْ، ناعْمِهْ تْكونْ. والخشنة لَتْفِلْفِلْ. والمثْلوثِهْ، اللّي بِالنّصْ بين النّاعْمِهْ والخِشْنِهْ، هايْ لَلْمَفتولْ. بِنْفَتْلُهْ بِطْحِينْ، على سِدِرْ. وَحَدِهْ لحالْها اللي بْتِفْتِلْ، بِتْحُط طْحينْ وْمِعْلَقةْ مَيْ، وِبْتِفْتِلْ. عَبيْنْ[1] ما يْصِيْر عندها هيكِهْ كمّيّهْ. وِبعدينْ عَلْمُنْخلْ بِتْنخِّلْ، عَشان الطْحين اللّي بِظَل عِنْدْها يِنْزَل.
لازم الحبة تْكونْ زَغِيرِهْ، بَسْ مِشْ زَغيرِهْ قَد اللّي بالسّوق. بِتْكونْ قَد حَبْةِ العَدَس. وِاللّي بِطْلَعْ أكبر، مِنْعَجْنُهْ وْبِنْحُطّهْ بَعدين على دايِرْ الطّنجرة. الشّطارَهْ بِدْها خِفّة إيْدْ؛ الخِفّهْ بِطْلَعْ مَعْها المفتول كْوِيّسْ.
بْنِيجِيْ للحُمّص والجّاج؛ الحُمّصْ مَسْلوق شْوَيّهْ. والجاج بِتْقَلّى، بِتْحَمّرْ شْوَيْ مع البَصَلِهْ، بِنْحَط عليه الحمُّص والـمَيْ وِلِبْهارات؛ بهارتها فُلْفل وِبْهار الفلفل، وْبِنْحَط كُلّهْ مع بعضُهْ وبِنْسكّر الطنجرة. وْبَعِدْ ما تِغْلِي الـمَي اللّي بيها الحمّص والجّاج، بِنْحَطّنْ المفتولات بْمِصْفايِهْ، كانوا يْسَمّوها (طَقّهْ)، وْبِتْغَطّى عليها، وِبِنْحُط على دايِرْها عجين من قِطَعْ المفتول الكبيرِهْ. الْعيلِهْ إذا كْبيرِهْ بِدْها مِصْفاتين.
المفتول بِسْتوِي عالْهُبّالْ[2] اللي بِطلَعْ مْنِ الطنجرة. بَعْديْنْ بْنُفْرُم راس بَصَلِهْ، بِنْفَرِكْ بفلفل وبهارات، وبْنِفْتَح بْنُصّ المفتول وبنحط فيه البَصَلِهْ مع معلقة سمنهْ وبتغطيه. بْتِطْلَعْ رِيْحِتْها بِتْشَهّي. إذا احتاجت بِتْرُش شْوَيّةْ مَيْ، بِتْفَلْفل لحالُهْ.
بِسْتَوي عَالهُبّال، بَعدين بِنْحَط بْجاطْ، وبِنْديْرْ عليها مَيْة الجّاج؛ بِنْشَرّبْها بِالْمَيْ. وْفِيْ ناسْ بِتْحُطْها لَحالْ وْبِتْحط المي عَلى جنِبْ.
[1] عبين ما: حتى
[2] الهبال: بخار الماء
على النار
بزيت الزيتون
